د پېښو چارو د همغږۍ معین په فراه ښار کې د دوو وقایوي پروژو څخه لیدنه وکړه
له پېښو سره د مبارزې آمادګۍ ملي ادارې د پېښو چارو د همغږۍ معین؛ محترم الحاج ملا عبدالولي څارنوال (حاجي وارث) فراه ولایت ته د خپل رسمي سفر په لړ کې، د دې ولایت له دوو مهمو وقایوي پروژو څخه لیدنه وکړه.
په دې لیدنه کې، له معین صاحب سره د فراه ولایت له پېښو سره د مبارزې آمادګۍ ریاست رئیس؛ محترم الحاج مولوي محمد اسرائیل سیار او د هغه پلاوي هم ملګري وو.
په لیدونکو پروژو کې، د فراه ښار ۲۴٬۸۲۶ متر مکعب حجم لرونکی کانال او د فراه ښار په شپږمه ناحیه کې د ۱۱۸ مترو په اوږدوالي سره یو استنادي دیوال شامل وو.
د دې پروژو د تطبیقولو موخه، د سېلابونو د خطرونو کمول، د اوسېدو وړ سیمو ساتنه او د ښار د وقایوي زیربناوو قوي کول دي. چې د استنادي دیوال پروژه بشپړه او په فراه ښار کې له روسوباتو څخه د کانال د پاکولو لړۍ دوام لري، چې د دې پروژې په تطبیقولو سره به د فراه ښار په زیانمنونکو سیمو کې له ۱۰۰۰ څخه زیاتې کورنۍ د سېلابونو له احتمالي زیانونو څخه خوندي شي.
د پېښو چارو د همغږۍ محترم معین د کتنې په لړۍ کې، د فراه ولایت له پېښو سره د مبارزې امادګۍ ریاست څخه د هغوی د هڅو د قدرداني کولو ترڅنګ د خلکو د زیانمننې په کمولو کې د وقایوي پروژو د تطبیقولو پر اهمیت ټنګار وکړ او لارښوونه یې وکړه، چې کارونه دې په ټاکلي وخت کې د تخنیکي معارونو په پام کې نیولو سره بشپړ شي.
نېټه: ۱۴۴۷/۰۵/۱۳ هـ ق
له پېښو سره د مبارزې آمادګۍ ملي اداره
