له پېښو سره د مبارزې آمادګۍ ملي ادارې او د افغانستان د ښځو بنسټ ترمنځ د ۱۴۲,۴۵۴ ډالرو په ارزښت د ګډو همکاریو تفاهم نامه لاسلیک شوه

نن ورځ دوشنبه، له پېښو سره د مبارزې آمادګۍ ملي ادارې سرپرست الحاج ملا نورالدین ترابي، د افغانستان د ښځو بنسټ له سرپرست رئیس عبدالجبار یوسفي سره په خپل کاري دفتر کې وکتل.
ترابي صاحب، د یاد بنسټ راغلي پلاوي ته د ښه راغلاست ترڅنګ وویل، چې خوښ یو چې زیانمنو کورنیو ته د روژې په مبارکه میاشت کې مرستې وېشل کېږي او د دې بنسټ د ټول کاري ټیم څخه یې مننه وکړه چې زموږ د ځورېدلي ولس سره همکاري کوي. 
نوموړي زیاته کړه، چې یاد بنسټ باید ژر تر ژره زیانمنو کورنیو ته مرستې ورسوي تر څو د روژې په مبارکه میاشت کې د مرستو څخه برخمنې شي.
ورپسې، د افغانستان د ښځو بنسټ سرپرست رئیس عبدالجبار یوسفي وویل، چې غواړو افغان ولس ته د بېلابېلو لارو څخه مرستې برابرې کړو او پرمستحقو کسانو یې وویشو.
د یادونې وړ ده، چې یاده تفاهم نامه چې لاسلیک شوه د ۱۴۲,۴۵۴ (یو سل او دوه څلوېښت زره او څلور سوه څلور پنځوس) ډالرو په ارزښت به د بغلان ولایت په برکۍ ولسوالي کې ١٠٠٠ سیلاب ځپلو کورنیو ته خوراکي توکي ووېشل شي، په دې توګه، چې هرې کورنۍ ته به د ۱۲۰ ډالرو په ارزښت یوه بوجۍ ۵۰ کیلویي اوړه، یوه بوجۍ ۲۴،۵ کیلویي وریجې، ۱۰ لیټره غوړي، ۷ کیلو لوبیا، دوه پاکټه مالګه، ۱ کیلو خرما، ۱ کیلو شین چای او ۷ کیلو بوره وېشل کېږي.

نېټه: ۱۴۴۶/۹/۱۷ هــ ق 
له پېښو سره د مبارزې امادګۍ ملي اداره