له پېښو سره د مبارزې آمادګۍ ملي ادارې او د افغان ښځو د همغږۍ او پرمختګ موسسې ترمنځ ټولټال د لس زره او شپږ سوه او شپږ ویشت (۱۰,۶۲۶) ډالرو په ارزښټ د ګډو همکاریو تفاهم نامه لاسلیک شوه
نن سهار د دوشنبې په ورځ، له پېښو سره د مبارزې آمادګۍ ملي ادارې د مالي او اداري عمومي رئیس، محترم الحاج مولوي محمد عالم علمیار د افغان ښځو د همغږۍ او پرمختګ موسسې له مرستیال، محترم محمد نور صالحي سره وکتل او د ګډو همکاریو تفاهم نامه یې ورسره لاسلیک کړه.
محترم الحاج مولوي محمد عالم علميار په دې ليدنه کې وويل چې د دې تفاهمنامې لاسليک کول د هېواد له زیانمنو خلکو سره د مرستې په لاره کې يو مهم ګام دی او موږ د داسې پروژو له پلي کېدو هرکلی کوو.
همدارنګه د افغان ښځو د همغږۍ او پرمختګ موسسې مرستیال، محترم محمد نور صالحي، د يادي پروژې په اړه معلومات وړاندې کړل او د دې تفاهمنامې پر وخت او په شفاف ډول د پلي کولو ژمنه يې وکړه.
په پای کې، دواړو لوريو ټولټال د لس زره او شپږ سوه او شپږ ويشت (۱۰,۶۲۶) ډالرو په ارزښت د ګډو همکاریو تفاهم نامه لاسليک کړه. چې له مخې به یې، ياده موسسه د خوړو نړیوال پروګرام په ملاتړ د پکتيا ولايت په ولسواليو کې، د پېښې رامنځته کېدو په صورت کې او له سروې وروسته، ۲۴۵ کورنيو ته نغدي او يا هم خوراکي توکي ووېشي. په نغدي مرستو کې به هرې کورنۍ ته ۵۸۰۰ افغانۍ په دوو پړاوونو کې ورکړل شي، او په خوراکي مرستو کې به هرې کورنۍ ته ۱۰۰ کيلو اوړه، ۹.۱ کيلو غوړي، يو کيلو مالګه او ۱۲.۵ کيلو دال ووېشل شي.
نېټه: ۱۴۴۷/۲/۱۷ هـ ق
له پېښو سره د مبارزې آمادګۍ ملي اداره
