له پېښو سره د مبارزې آمادګۍ ملي ادارې لوی رئیس د افغان اېډ مؤسیسې د راغلي لوړ پوړي پلاوي سره وکتل
نن ورځ پنج شنبه، له پېښو سره د مبارزې آمادګۍ ملي ادارې لوی رئیس الحاج ملا نورالدین ترابي د لندن د افغان اېډ دفتر د امنا هیئت رئیس ښاغلې کریستوفر ویلیام (کیندر)، په لندن کې د افغان اېډ د دفتر د امنا هیئت غړي ښاغلي روبین جیمز سنکلییر تایلر، ښاغلی مارک راینر بودین، ښاغلی نایجل ډیویډ پوول، په افغانستان کې د افغان اېډ مؤسیسې عمومي رئیس ښاغلی چارلس (ډیوی)، په افغانستان کې د افغان اېډ مؤسیسې د برنامو د پلي کولو او کیفیت رئیس ښاغلی عبدالرحمن طارق او د افغان اېډ د دفتر د یوې پروژې مسئول ښاغلی محمد فواد داود زاده سر په خپل کاري دفتر کې وکتل.
ښاغلې ترابي صاحب له هرڅه مخکي ټولو ته د ښه راغلاست ترڅنګ وویل چي موږ ستاسو څخه ځانګړي مننه کوو چي په افغانستان کي د ۴۳ کلونو راهیسي فعالیت کوی او لا هم دې برخي ته ژمن یاست.
همداراز ښاغلې ترابي صاحب زیاته کړه چي افغانستان په هره برخه کي ډیر کار ته ضرورت لري خصوصاً له پېښو سر د مبارزې آمادګۍ اداره ځکه چي په هیواد کي طبیعي او غیرطبیعي پېښې راځي د هغوی ټول مشکلات دې ادارې ته راجع کیږي.
همداراز یې وویل چي موږ په پنځه برخو کي خلګو ته خدمتونو کوو لکه وقایه کول، پېښو ته چمتوالی، مخینوې، کومک کول او بیا رغونه ده خو د وقایې په برخه کي باید ډیر کار وسي ځکه د وقایوي پروژو په پلي کیدو سره په کم مصرف د ډیر زیان مخه نیول کیږي نو د دی لپاره باید خلګو استنادی دیوالونه او ته چیک ډیمونه جوړ سې، د چیک ډیم جوړول ډیري ګټي لري چي د دوې مهمي ګټي یې دادي چي اوبه پکښې زیرمه کیږي او بل رواني اوبه خلګو ته زیان نسي اړولی.
ښاغلې چارلس تر هرڅه مخکي د دې ادارې د لوی رئیس او کاري ټیم څخه ځانګړي مننه وکړه او زیاته یې کړه چي د دې ادارې په کارونه کي پوره شفافیت او چټیکتا راغلې ده او مننه یې وکړه چي موږ ته مو د ملاقات وخت راکړ.
د افغان اېډ مؤسیسې لوی رئیس ښاغلي چارلس زیاته کړه چي دوی په افغانستان کي د ۴۳ کلونو راهیسي په ۱۳ ولایتونو کي فعالیت کوې او افغان اولس ته په بیلابیلو برخو کي کار کوې.
همدا رنګه ښاغلي چارلس زیاته کړه چي سږ کال د افغانستان لپاره ۱۶ ملیونه پونډه بودیجه لرو چي یو اشاره یې پنځه (۱.۵) میلونه پونډ د پېښو برخي ته ځانګړی کړې ده او په راتلونکي کي به تفاهم نامه هم سره لاسلیک کړو.
په ورسیتو کي راغلي پلاوي د یادي ادارې د لوی رئیس څخه ځانګړي مننه وکړه او خوښې یې وښودل چي په دې اداره کي زیات بدلون راغلی دی او موږ به هم هڅه کوو چي د دې ادارې د لاري خلګو ته غوره خدمتونه وړاندي کړو.
نېټه: ۱۴۴۷/۲/۲۷ هــ ق
له پېښو سره د مبارزې آمادګۍ ملي اداره
