له پېښو سره د مبارزې آمادګۍ ملي ادارې لوی رئیس ننګرهار ولایت ته سفر وکړ او د ختیځ زون د ولایتونو له پېښو سره د مبارزې آمادګۍ ریاستونو له کارکوونکو او رضاکارانو سره یې بېړنۍ غونډه وکړه
نن ورځ د شنبې په سهار، له پېښو سره د مبارزې آمادګۍ ملي ادارې لوی رئیس، محترم الحاج ملا نورالدین ترابی د ریاستالوزرا عالي مقام د لارښوونې پر بنسټ، د یو تخنیکي او مسلکي پلاوي په مشرۍ د وروستیو جګړو له امله بېځایه شويو ته د رسېدنې په موخه ننګرهار ولایت ته سفر وکړ.
په دې غونډه کې چې د ننګرهار، لغمان، کونړ او نورستان ولایتونو له پېښو سره د مبارزې آمادګۍ ریاستونو رئیسانو او کارکوونکو او د ختیځ زون رضاکاران شتون درلود، ترابي صاحب وویل چې د ریاستالوزرا عالي مقام د لارښوونې له مخې د ختیځ زون د ولایتونو د بېځایه شويو بېړنیو اړتیاوو ته د رسېدنې مسؤلیت دې ادارې ته او د سویلي ولایتونو مسؤلیت سرې میاشتې ته سپارل شوی دی. له همدې امله موږ خپل کار په ټولو امکاناتو سره پیل کړی او کلی په کلی به کره سروې ترسره کوو، څو که له دې ولایتونو کوم بېځایه شوی حتی په کابل یا په بل ولایت کې هم موجود وي، هغوی ته به لازمه رسېدنه وکړو.
محترم تـ.رابي صاحب وویل، چې موږ په خپلو ګدامونو کې لازم امکانات لرو او د اړتیا په صورت کې له نورو ولایتونو څخه هم توکي انتقالوو او د ریاستالوزرا عالي مقام هم د هر ډول ملاتړ ژمنه کړې ده.
ورپسې د ادارې لوی رئیس د ۲۲ مادهییزې اجنډا په اړه بحث وکړ او د هرې مادې په اړه یې جلا جلا نظرونه او وړاندیزونه ترلاسه کړل او په اړه یې لازمې پرېکړې ونیول شوې. او ۱۶ مختلفی کمیټی وټاکل سولی او کمیټو په خپل کار شروع وکړه.
نیټه: ۱۴۴۷/۱۰/۱۰ هـ ق
له پېښو سره د مبارزې آمادګۍ ملي اداره
